Árið 2008

Eftir nokkur mögur- og þreytt ár í formi nútíma móðurharðinda, án þess þó að Laki spúi eldi og ösku yfir landsmenn og konur, er ég ekki frá því að telja að árið 2008 verði árið mitt. Á því ári mun ég eignast eingetinn son, útskrifast úr sálfræðinni og hefja meistaranám við HÍ.

Vúhú!

Fiðrildavika...

Síðuhaldari hefur á undanförnum vikum velt vöngum yfir þeirri upplifun eða reynslu sem einstaklingar hafa löngum látið uppi um að fá fiðrildi í magann. Ekki hefur slíkt hent síðuhaldar svo hann hafi orðið var við, enda liggur það ekki ljóst fyrir hvernig slíkt getur komið fyrir. Þeir takmörkuðu vitsmunir sem síðuhaldari hefur yfir að búa, hafa undanfarið reynt að brjóta það til mergjar hverslags hægðir slíkir einstaklingar hafi sem í sífellu eru að fá fiðrildi í meltingarfærin. Nú er það svo að görn og endaþarmur síðuhaldar er ekki í stakkbúinn að ráða við fiðrildasaurlosun, þannig betra er að vænta þess að slíkt komi ekki fyrir undirritaðan á næstu misserum. Vert er að vara lesendur við einkennilegum atburð sem nú stendur yfir í höfuðstað landsbúa, ef reyna á að koma á í veg fyrir áðurnefnd óþægindi.

e.s. Læt fylgja með eina mynd frá síðustu helgi, þar sem skundað var upp á Móskarðhnjúka... engin fiðrildi þar...

Sússí

Fyrir ekki svo löngu síðan þá gerðum við félagarnir okkur dagamun og skelltum okkur á nýmóðins veitingastað í miðborg Reykjavíkur. Þegar inn á staðinn var komið, blasti við síðuhaldara aðstaða ekki ósvipuð þeirri sem ferðalöngum er boðið uppá þegar beðið er eftir farangri á Reykjavíkurflugvelli. Reyndar var færibandið í smækkaðri mynd, og í stað farangur var eitthvað óeldað puttafæði borið fram á mislitum diskum. Þrátt fyrir að kokkurinn hafi ákveðið að henda þessu hráu fram, reyndist þetta hin besta fæða, en fyrir áhugasaman þá fer ekki tvennum sögum af hægðum síðuhaldara eftir þessa reynslu.

Ath. Myndin er ekki af vettvangi...

Veðurspá

Af þessari gervitunglamynd má sjá djúpa lægð nálgast landið, en á næstu misserum stefnir í vaxandi suðaustanátt og þykknar smám saman upp sunnantil. Lengst af má þó búast við hægviðri í norðri, þó þykkni upp þegar líða tekur á vorið. Gera má ráð fyrir allhvassri suðaustanátt með slyddu eða rigningu, einkum sunnanlands, en snýst í mun hægari þegar líður tekur á sumarið, fyrst sunnantil og loks í norðri þegar daginn tekur að lengja. Útlit er þó fyrir sólríkt og fallegt sumar í júní byrjun.

Komma-Cola

Fór á heimildarmynd um umhverfisvanda samtíðarinnar í kvöld, þar sem farið var yfir þá framfærslu þróun sem mannkynið hefur búið við og skapað sér í seinnitíð. Myndin var í fullu samræmi við heimildarmyndina sem Al Gore stóð að fyrir nokkrum misserum síðan, þó að öllum fjölskylduhögum höfunda hafi verið haldið utan við ræmuna í þetta skiptið.

Eftir myndina var mér tjáð af vængmanni þá hugmynd sem komið hefur fram að umhverfisvernd sé sprottin undan úrkulnuðum kommúnistum sem gefið hafa hugmyndafræðina upp á bátinn eftir skipsbrot þeirrar hyggju á síðari áratugum síðustu aldar. Þeir hafi síðan fundið hugmyndafræði sinni nýjan farveg til þess að berja á kapitalismanum í gegnum umhverfisvernd. Það er til þess að sigra hið illa frelsi fjármagnsins og koma á miðstýrðri forræðishyggju til þess að bjarga 0kkur öllum frá glötun.

Ég læt vera í þetta skiptið að túlka í ofangreinda tilgátu, leyfi öðrum að gera það í bili...

Eru kvenmenn skaufalaust afbrigði af Homo Sapien?

Samræður manna á millum geta vissulega verið fjölbreyttar eftir því hver á í hlut. Fyrir nokkrum vikum átti ég spjall við ágæta frænku mína sem er við nám á Hvanneyri. Innihald samtalsins snéri að því hvernig Lundar væru kyngreindir. Þrátt fyrir tíðar yfirlegur síðuhaldara síðastliðið ár á David Attenborough heimildarþáttum, sem taka á mökunartilburðum dýra, þá tókst mér ómögulega að komast að niðurstöðu um kyngreiningu á Lundum, en þessi óvissa hefur haldið vöku fyrir síðuhaldara undanfarna vikur.

Það var þó ekki fyrr en fyrir fáeinum dögum að samtal okkar barst aftur að fyrrnefndri greiningu. Þar var mér tjáð að þar sem Lundinn væru skaufalaus tegund þá væri nauðsynlegt að kryfja þá til þess að komast að niðurstöðu um kyn. Þar hafið þið það!

Með þetta í huga þá fannst mér alveg nauðsynlegt að taka á því hvort kvenmaðurinn væri skaufalaust afbrigði af Homo Sapien. Nú er það svo að með gífurlegri framþróun karlskepnunnar hjá Homo Sapien, þá hefur þeim hlotnast sú náðargjöf að geta losað sig við þvag án þess að fara í fósturstellinguna, þó svo að einstaka eftirlegukindum hafi ekki tekist að fylgja eftir þessari hröðu framþróun. Þessi geta karldýranna tel ég skipta sköpum í framþróun tegundarinnar, á meðan fjölriðlar þjáðir af blöðrubólu, munu sitja eftir eins og Framsókn í Hull, á setunni.

Kveðja,

e.s. að öðru... kíkið á þetta “I wanna love you tender”

Felmtursröskun og fjölþreifni

Það hafa orðið vissar breytingar á þeim tíma síðan síðuhaldari flutti inn í klettastíginn, vorið 2005. Þegar sófaburði og þarmaþerrisinnkaupum lauk í upphafi nýs búsetuforms, voru þær íbúðir er prýða stigaganginn upp fullar af einstæðum mæðrum, sem í sakleysi sínu veittu því ekki athygli að gliðnun hefði komið fram í hænsnanetinu við val á íbúendum.

Á þessum tíma sem liðinn er frá því að síðuhaldari flutti inn, hefur mæðrunum fækkað niður í eina, sem nú hyllir undir að sé á förum.

Ekki er vitað með vissu, hvort það sé fjölþreifni, léleg sameignarþrif, gleðskaparhöld utan kristilegs tíma, gríðarleg aukning í hússjóð sökum söfnunar öldrykkjarfanga eða tíð matarboð sem ýtt hafa undir þann atgerfisflótta sem staðið hefur yfir síðast liðin tvö ár. En þeim óvissuþætti ætti að ljúka fljótlega þar sem brátt hyllir undir að klettastígurinn losni undan því oki sem lagt hefur verið á hann undanfarin misseri.

Kveðja,

Áramótaheit

Jæja þá er skólinn hafinn að nýju, en honum fylgir öllu jöfnu tíðari skrif á rafræna tilverustigið mitt. Þessum skrifum stefni ég nú á að halda til streitu, minnsta kosti fram á vorið, en enginn er spámaður í eigin föðurlandi.

Eins og flestir samlandar þá byrjar maður árið á því að setja sér óraunhæf markmið, sem að vanda eru ákveðin undir vafasömum kringumstæðum sökum mikillar ölvunar. Einnig ríkir ákveðin bjartsýni í að mökunartilburðir síðustu ára kl:02:45 fari nú loks að skila sér í auknum tilraunum til undaneldis, en samblanda af þessu ræður yfirleitt þeim heitum sem strengd eru í upphafi nýs árs.

Læt þetta nægja í bili...

Kveðja,

Bannað að ríða fullur

Nú er mér öllum lokið. Ef þessi fyrirsög nær fram að ganga, þá er þetta bara búið!!!!

Kveðja,

Af hverju er kúkurinn brúnn en ekki bleikur?

Það er litarefnið saurbrúnka sem gefur kúk lit og hann verður brúnn en ekki bleikur, blár eða grænn af því að þetta er brúnt litarefni. Ef kúkurinn ætti að vera bleikur þyrfti eitthvert annað litarefni að koma til.

Lifrin kemur mikið við sögu í lit hægða. Þar verða til svokölluð galllitarefni og kallast eitt þeirra gallrauða. Lifrin losar gallrauðuna út í smáþarmana þar sem efnið tekur breytingum. Mest af því verður að saurbrúnku í ristli sem er einmitt það efni sem gefur hægðum einkennandi lit sinn.

Kveðja,

Reisn hjá Kviðmágum

Kviðmágaklúbburinn verður endurvakinn á föstudaginn næstkomandi, þegar félagsmenn munu spyrna sólum í svörðinn og hefja lóðalyftingar af kappi. Svitabönd, hitakrem og apaskinnsgallar verða brúkaðir sem aldrei fyrr.

Þó svo að starfsemi klúbbsins hafi ekki verið upp á borðum sveitunga norðanheiða undanfarna mánuði, hafa félagsmenn nýtt þann tíma sem liðinn er frá síðasta félagsfundi og styrkt innviði starfsins til muna.

Til að leiðbeina kumpánum hefur verið leitað á náðir ónefnds fjölriðils í bænum til þess að miðla af reynslu sinni í vaxtarmótun og olíuburði.

Gera má sér grillur að með fyrrnefndi átaki sé ákveðin hætta á að síðuhaldari fari að bera á sig krem, losa þvag í fósturstellingunni og skeina sig eftir viðrekstur.

Eftir að síðuhaldari byrjar í ræktinni, er aldrei að vita nema nokkrir tímar verði teknir í hommagrillinu, og eftir það verð ég eins og innfæddur!!


Kveðja,

Fisk á minn disk.

Setningin „Fisk á minn disk“ hefur fengið nýja merkingu frá og með deginum í dag. Frá því um miðbik síðustu aldar, hefur ekki verið leyft að veiða hvali í atvinnuskyni, en nú er öldin önnur í tvennum skilningi.

Þegar ég fylgdist með því í fréttunum í kvöld þegar hvalbáturinn lagði í hann, var mér hugsað um þvílíka hugmyndaauðgi íslendingar hafa við nafngiftir á atvinnutækjum, Hvalur 1., Hvalur 2., Hvalur 3. o.s.fv. Þetta minnti mig einmitt á að það er fyrirtæki í borg óttans sem sérhæfir sig í skolphreinsunum, en þar eru atvinnutækin nafngreind með því að bera nöfnin Kúkur 1. Kúkur 2. Kúkur 3. o.s.fv.

Kveðja,

Æ njú it!!

Á vissum tímapunkti í fyrndinni kom tegundin Homo erectus fram. Næsta þróunarstig lífverunnar sem lifði af var Homo sapien, sem myndi teljast til nútímamannsins.

Þessi uppréttingarþróun átti sér ekki stað til þess að karlmenn myndi setjast niður við þvaglát.

Máli mínu til staðfestingar vísa ég í Guðjón Haraldsson, þvagfæraskurðlæknir á Landspítalanum. Hann segir að engar rannsóknir styðji það eða hafni að betra sé að pissa sitjandi. "Það hefur ekki verið hægt að sýna fram á það að blaðran tæmist betur þótt menn sitji."

Kveðja,

Hringvöðvarof á kostnað gylltraveiga

Púður á punginn, krem á kúlurnar, lotion á lókinn, allt til þess að koma í veg fyrir yfirvofandi hringvöðvarof. Fyrir þá sem ekki vita það nú þegar, þá hefur síðuhaldari losað sig við bílinn og keypt sér stálfák mikinn og þeysist nú um höfuðból norðurlands á tveimur jafnrúllandi.
Dagurinn í dag er sá annar í röðinni þar sem einungis er notast við hjólið. Verður nú að viðurkennast að smávægileg fráhvarfseinkenni hafa komið fram, en huggunar er leitað með aukinni kaffidrykkju.
Búið er að bjóða mér far suður um helgina til þess að ná aftur í bílinn, en reynt verður að sporna við kenndum í þá átt af fremsta megni.
Reyndar þegar bílreksturinn er tekinn út af efnahafsreikning síðuhaldara, þá liðkast fyrir aukinni veigadrykkju á tyllidögum, sem verður nú að teljast það jákvæðasta við áður nefnda ákvörðun að losa sig við bílinn.

WWIII

Að liggja svefndrukkinn í koju í síðutogara í seinni heimstyrjöldinni, sem skyndilega verður fyrir miklu höggi og ískaldur sjórinn tekur að flæða inn og fylla káetuna og myrkrið yfirtekur rýmið.

Þá skyndilega vaknar maður upp við að skólinn er byrjaður. Áður en maður veit af þá situr maður í tíma á mánudagsmorgni. Einhverstaðar ómar í fjarska, ekki ólíkt og væl í þokulúðri að það sé verið að tilkynna að það sé hugfræðipróf í fyrramálið

Hugfræðin var síðan tekin með trompi í morgun...

Var að setja inn myndir frá hálendisskreppi túrnum um helgina.

Kveðja,

Á sandölum í sandöldum

Mikið helvíti er ég ánægður með það sem ég hef afrekað í sumar. Ég hef nýtt þetta sumarfrí í ferðalög frá A til Ö. Búinn að aka yfir 10.000km, ganga eitthvað álíka, allt innanlands og búinn að gista um 16 sinnum í svefnpokanum mínum, held að það sé gott í bili.

Ferðirnar hafa verið ákaflega mismunandi, þannig að erfitt er að gera upp á milli þeirra. Það verður þó að teljast að svæðið norðan Vatnajökuls var ákaflega tilkomu mikið. Enda er landið markað atburðum sem hægt er að rekja til áhrifa þessa stærsta jökuls í Evrópu. Beinast liggur við að nefna Ásbyrgi sem er myndað af hamfarahlaupi sem kom úr Vatnajökli og myndaði hið meinta hófafar Sleipnis. Einnig var ákaflega sársaukafullt að sjá þau mannanna verk sem eiga sér stað á Kárahnjúka svæðinu. Með því verð ég víst að éta ofan í mig fyrri fullyrðingar um það svæði sem Hálslón mun hylja.

Búinn að setja inn mikið mikið magn af myndum hér til hliðar. Gestaþraut vikunnar er staðsetning síðuhaldara á myndinni hér að ofan.

)(...?

Nú þegar tímabil iljameina og sólbruna er í rénum hjá síðuhaldara, er ekki úr vegi að snú sér aftur að tíðindafærslum. Hef ég sem sagt skilaði mér að mestu óskaddaður frá reisu okkar mág míns um suðurlandshálendið, en ég mun setja myndir úr ferð minni um Laugarveginn inn innan skamms...

Næsta verkefni sem liggur frami, er að gera eitthvað úr fríhelgi verslunarmanna. Ýmsar hugmyndir eru kreiki, en ekki stendur á mér að framkvæma gleðilega gjörninga að kvöldlagi um landsins sveitir og brúnaþunga þankaganga í dagrenningu.

Járnaður klárinn og lopa hulinn fleygurinn verða til brúks, en að öllum líkum verður stefnan tekin á Ásbyrgi til að hlýða á Sigurrósar menn og konur, er munu troða þar upp á föstudagskvöldinu. Það sem eftir lifir helgi er óráðið, en það mun ráðast af ferðafélögum.

Strax eftir verslunarmannahelgina verður skundað um víðan völl um hálendi Íslands, en jeppaferð er á dagskrá, sem mun enda við Kárahnjúka. Við teljum að nauðsynlegt sé að sjá þær framkvæmdir og það landsvæði sem mun fara undir lónið, en stefnt er á að byrjað verði á að fylla það með haustinu.

Kveðja,

þramm og þjark.

Nú styttist í Laugarvegsgönguna sem við mágur minn höfum verið að undirbúa okkur fyrir undanfarnar vikur.
Ætli ég skelli mér ekki suður á fimmtudeginum svo ég hafi ráðrúm til þess að kaupa það sem upp á vantar. Við eigum bókaða gistingu í Höskuldarskála við Hrafntinnusker laugardagsnóttina, þannig að stefnt er að því að við verður ekki seinna en á hádegi í Landmannalaugum.
Reyndar kom babb í bátinn hjá mér á sunnudaginn þegar ég gekk á Kerlinguna (1536m) í Eyjarfirði, en þegar ég var á niðurleið fór ég að finna til í hægra hnénu, en það mun vera einhverjar bólgur í sinafestingum sem erum að hrjá mig. Vonandi verður það búið að jafna sig í vikunni.

Myndin er af síðuhaldara á toppi Kerlingar, séð niður í Eyjarfjörðinn. Áhugasam(ar/ir) geta nálgast fleiri myndir hér til hliðar.

Arkað af ákefð.

“Sumarið er tíminn”... Þessi einföldu orð Bubba hef ég haft að leiðarljósi í ferðum mínum um land og lýð. Hef ég komið víða við og er hvergi nærri hættur, þ.e. ef ég á að hafa þrek í loka ár mitt í Háskólanum á Akureyri.

Á liðnu sumri hef ég gengið á fjölda fjalla auk þess að hafa farið um Vestfirðina og Norðurlandið, en einnig stoppaði ég stutt í Landmannalaugum og gekk um nágrenni lauganna og gisti í nærliggjandi skálum. Reyndar mun ég og mágur minn mæta innan tíðar í Landmannalaugarnar og spyrna sólum í hraunfláka og taka stefnuna í átt að Þórsmörk.

Eftir að slitnir skósólar og þreyttir leggir leggja upp laupana á grónum gresjum Þórsmerkur, mun ég taka ákvörðun um hvort ég þreyti einnig þá raun að ganga að Skógum, yfir Fimmvörðuhálsinn... sjáum til, en við munum leggja upp þann 22. júlí.

Herðubreið um helgina...

Myndin er tekin í undraveröldinni í Vogunum í Mývatnssveit sem ég heimsótti um síðustu helgi.

Leitin af hinum stóra.

Nú mega fiskistofnar norður-atlandshafsins vara sig, því síðuhaldari er búinn að festa sér kaup á átta feta silungsstöng og verða sér út um afnot af fluguveiðistöng fyrir sumarið.
Nú þegar hefur verið skundað um víðan völl í leit af hinum stóra. Ekki hefur sú leit enn skilað árangri, en sjáum til hvað býr í skauti sumarsins.
Hef ég orðið mér út um mikla aflakló til leiðsagnar um hvert ber að ota stönginni til árangurs. Aflabrögð sumarsins hafa aðallega falist í því að húkka spúninum í bakpokann, skálmina og í grasbakka, en allt horfir til betri vegar með hækkandi sól.

Þegar ég var að skoða landið og miðin í tilraun minni til þess að finna hentuga veiðistaði. Þá var mér hugsað til hversu nauðsynlegt er að huga vel að náttúrunni og skilja við sig á þann máta sem komið var að. Við þessa hugsun fór ég að rifja upp fyrir mér þegar laxastofninn hrundi í Elliðaánum sumarið 1994. Þá kom upp svæsið tilfelli af kílaveiki í Íslenska laxastofninum. Orsök þessarar óværu fannst ekki, en sjónir bárust fljótt að þáverandi borgarstjóra Ingibjörgu S. Gísladóttur. Talið er að þegar hún veiddi fyrsta lax sumarsins í Elliðaánum, eins og venjan er að borgarstjóri geri í reykjavík, þá hafi hún vaðið upp í klof og hrundið af stað atburðarás sem ómögulegt hafi verið að stöðva.

p.s. 26,7% lokið af þeim viðburðum sem ég setti mér í byrjun sumars, nánar tiltekið 16. maí.

Tilkynning!!

Síðuhöfundur hefur búið sér til vísi af myndasíðu, hægt er að nálgast hana hér til hliðar. Ég mun hlaða inn myndum við tækifæri, hef þegar sett inn þrjú myndasöfn.

Kveðja,

Hraunsvatn

Eins og ég var búinn að einsetja mér í sumar þá hef ég unnið að því hörðum höndum að kynnast norðurlandi betur en mér hefur tekist hingað til.

Í vikunni þá settum við stefnuna á Hraunsvatn í Öxnadal, en það er staðsett í dalverpi í 492 metra hæð. Þess má geta að faðir Jónasar Hallgrímssonar drukknaði í fyrrnefndu vatni þegar skáldið var á barnsaldri.

Hraunsvatn er staðsett á alveg ótrúlega fallegum stað í skjóli hárra fjalla og ekki skemmir fyrir að vel sést til Hraundrangans sem gnæfir yfir Öxnadalnum.

Til að komast að vatninu þá er gengið frá bæ sem nú hýsir veitingastaðinn Halastjörnuna, en um 45 mínútna ganga er að vatninu. Gengið er yfir gróinn jökulruðning, létt og skemmtileg ganga. Sæmileg veiði er í vatninu, en það var einmitt einn að hvötunum fyrir ferðinni að reyna að bæta stöðuna í frystinum með vænni vatnableikju. Sá stóri lét sig ekki í þetta skiptið en stefnan er sett á aðra tilraun í vikunni, en meðan við biðum við stöngina þá dreyptum við að sjálfsögðu á kaffi og brjóstbirtu. Síðuhaldari eldaði síðan væna súpu þegar líða tók á daginn.

Myndin er af veiðifélögunum...

p.s. ég hef verið að spá í að koma mér upp myndasíðu, en með henni gætu síðugestir séð tilburði síðuhaldara í myndrænuformi. Getið þið mælt með einhverju ákveðnu forriti?

Rölt en engin rekkjubrögð.

Þá er fyrsta fjallabrölt ársins afstaðið. Stefnan var tekin á Súluna (1200m), nánar tiltekið þá nyrðri, sem gnæfir yfir Akureyrinni. Lagt var af stað frá ruslahaugum Akureyringa, já ég veit þeir kunna að skipuleggja þessa meintu náttúruperlu sem þeir telja Eyjafjörðinn vera.

Síðuhöfundur lagði af stað kl:17:30 en það er um 5 km ganga á toppinn og að sjálfsögðu aðrir 5 km til baka. Ég fer ekki ofan af því að þetta hafi verið það erfiðasta sem ég hef gert í ár, en ég var ekki kominn niður fyrr en um kl:21:30.

Það að ganga þangað upp eftir með vind upp á 20 metra á sekúndu beint í fangið og í beljandi rigningu var nánast meira en það sem minn dekraði skólarass var að ráða við. Ég var orðinn bugaður á líkama og sál þegar ég kom niður aftur. Hefði ekki komist marga kílómetra í viðbót. Þar sem þetta er nú fyrsta ganga ársins af mörgum, þá hefði ég nú alveg mátt búast við þessu.

p.s. farinn til Ísafjarðar um helgina...

Kveð alveg bugaður...

Hvað sagði ég?

Ég hef nú löngum haldið því fram, en nú er það staðfest. Óaðvitandi hef ég undanfarin ár verið að stunda mun heilbrigðara líferni en ég hef talið hingað til. Samkvæmt nýjustu rannsóknum, þá hefur það komið í ljós að ekki aðeins kaffidrykkja, heldur einnig áfengisneysla mín, hafi verið mér og öðrum til mikillar heilsubótar. Við svo búið mun ég taka á öllu mínu um helgina til þess að tryggja langlífi og ánægjuleg efri ár.

Ég vil enda þetta á tilvitnun í maðurinn í þröngu skyrtunni, sem var á fundi oddvita framboðanna í Reykjavík, sem sýnt var á NFS fimmtudaginn 25. maí “Hér er greinilega framboð í leit af atkvæðum...”

Bestu kveðjur

Tjérlingar vs. Kerlingar

Það fer alltaf sæluhrollur um mig þegar það kemur að hinu stórgóða og árlega sjónvarpsefni “Fegurðardrottning Íslands.” Ekki eru það einungis sundfatnaðarmátun þátttakenda sem vekur upp áhuga minn, heldur er það sá pirringur sem þessi keppni veldur íslenskum femínistum. Það er ekki fyrr búið að tilkynna þátttakendur, þegar fyrsta ályktun femínista kemur fram. Þær byggja oftast á skaðsemi þess að raka á sér fótleggina og armkrika, en það hefur löngum verið helsta baráttumáli þessa hagsmunasamtaka að banna Lady Shave vörur með öllum tiltækum ráðum.

Myndin sem fylgir með að þessu sinni er ekki nærmynd úr armkrika íslensks femínista, heldur af harðfiskhjalli á Hjalteyri.

Sumarleyfisafþreyingarþankar

Hvernig á maður að eyða sumrinu eftir að hafa setið sveittur í hýði háskólanáms. Það er efalaust hægt að finna upp ýmsar leiðir til þess arna. Ég hef verið með höfuðið í bleyti í þessum hugleiðingum, en ýmsar hugmyndir hafa verið að skjóta upp kollinum. Ég hef ákveðið að taka saman nokkrar hugmyndir sem ég er að spá að koma í verk í sumar.

Ég hef ákveðið að:

• Ganga á milli Þórsmerkur og Landmannalauga
• Ganga á Herðubreið
• Ganga GR11 í Pírenafjallgarðinum á Spáni
• Ganga frá Drekagili að Öskjuvatni og yfir að Öskjuopum
• Ganga á Hvannadalshnjúk
• Ganga á Kaldbak á Vestfjörðum
• Fara aftur í Vogagjána
• Ná mér í tjérlingu
• Fara í böðin á Mývatni
• Ganga á Vindbelgsfjall
• Ferðast um norðurland
• Ferðast um Vestfirði
• Ganga á Heklu
• Fara í útilegur
• O.fl...

Nú er bara að bíða og sjá hver nýtingar hlutfallið verður hjá mér, en ég stefni á framkvæma allt hér að ofan. Ef einhverjum langar að koma með mér í eitthvað að ofantöldum verkefnum, þá er það meira en velkomið.

Bestu kveðjur,

Annir í annarlok.

Nú er þessi önn á enda komin, og síðuhaldari byrjaður að vinna... byrjaður að vinna, á kannski ekki við þar sem ég hef verið að vinna nánast allt síðastliðið námsár. En ég fékk einmitt að halda þeirri vinnu í sumar. Reyndar ætla ég að reyna að eiga frí um helgar í sumar, en það yrði í fyrsta skiptið í fjöldamörg ár sem slíkt gerðist. Tilgangurinn með því er að ég ætla mér að vera ákaflega duglegur að ferðast í sumar, stefni á að leggja land undir fót, bæði innanlands og utan. Þar hef ég hugsað mér að klára að ganga á þá fáu fjallstoppa sem ég á eftir að stíga fæti á. Þar ber helst að nefna Herðubreið og Kaldbak fyrir vestan sem ég stefni á að klára í sumar, auk nokkurra jökultoppa.

Margt hefur drifið á daga Viðkunnanlegs síðan síðasta færsla var rituð. Eins og fram kom í síðustu færslu þá brá ég mér til fæðingarstaðar míns yfir páskana. Tilgangurinn var að bera hana ömmu mína Huldu Salóme Guðmundsdóttur til grafar, en hún átti 85 ár og 337 daga að baki.
Þar kom saman hin fjölmenna Úlfsár-fjölskylda sem telur 72 afkomendur Huldu og Veturliða G. Veturliðasonar, föðurforeldra mína.
Mér hlotnaðist sá heiður að fá að bera hana ömmu mína til grafar. Tel ég að virðingaverðara hlutverk sé vandfundið en að fá að bera ástvin síðasta spölinn.

Enda þetta á þessum skemmtilegu nótum í þetta skiptið...

Dreifbýlisakstursferð frh.

Eins og greint var frá í síðustu tíðindafærslu var stefnan sett á höfuðból Vestfjarða þann 12. apríl. Háskaförinni var heitið til Ísafjarðar með einnar nætur stoppi í vígi Húsvísku Fjallageitarinnar sem staðsett er í Heydal í botni Mjóafjarðar við Ísafjarðardjúp. Þar þykir ákjósanlegt að brynna búk og bugaðri sál með hveravatni og áfengu ropvatni undir stjörnubjörtum næturhimninum. Við félagar létum ekki þar við sitja heldur grilluðum okkur þýskar kjötafurðir í líki karlamannskynfæra, eflaust fullar af dýraafurðum sem ekki seljast nema í slíku dulargervi.

Þegar á heimaslóðir var komið tók við stíf áfengisdrykkja sem stóð yfir í fjóra daga og fjórar nætur, má segja að mér hafi tekist að drekka eigin líkamsþyngd af gerjuðu brauði, en ég er ekki frá því að ég hafi slegið eitthvað met í þeim efnum, þ.e. ef húsráðandinn, stóreigna maðurinn og ný-Bolsévikinn P.Magnússon er undanskilinn.

p.s. þegar ég næ fullri andlegri getu þá reyni ég að klára ferðasöguna.

Hættulegir tímar.

Dagurinn í gær var svartur dagur. Stundum veit ég hreinlega ekki hvað er hægt að treysta á lengur. það virðist ekki vera steinn yfir steini í tenglum við það sem maður telur vera hvað trausta í tilverunni.
Sá skelfilegi atburður sem reið yfir líf mitt í gær var að kaffibrúsinn minn bilaði, tappinn brotnaði. Þetta gerðist á versta tíma, en ég legg af stað til Ísafjarðar á morgun. Ég er ekkert viss um að ég treysti mér í ferðalagið án brúsans míns. Þarf líklegast að hringja á undan mér á bensínsjoppurnar og athuga hver sýrnin er auk uppruna og brennslustig á því kaffi sem í boði er.

En ég hef ákveðið að lifa hættulega og láta á það reyna að komast til Ísafjarðar á því kaffi sem þjóðvegapulsusjoppur landsins bjóða uppá.

Framhald síðar...

p.s. læt mynd #2 frá því á árshátíðinni fylgja með.

Bölvaðir Bolsévikar

Illu er víst best af lokið, en með það í huga þá fóru formanns kosningarnar sem ég var í kjöri til ekki á þann veg sem ég hefði kosið, og í raun kaus í.
Villuráfandi Bolsévikar fjölmenntu og höfnuðu nýfrjálshyggju hugmyndum mínum, sjálfum sér og öðum til skaða, en ekkert er svo með öllu illt að ekki boði eitthvað gott, nemendur Háskólans á Akureyri höfnuðu alfarið öllum tilburðum BÍSN-liða við að reyna að hneppa okkur í gæsluvarðhald líkt og á liðnu ári.

Hvað um það, það styttist í páska og verður stefnan tekið á fæðingarstað síðuhaldara, með snjóbrettið og skólatöskuna í skottinu. Frést hefur að hún litla frænka mín munu verða á svæðinu. Nú er bara spurning hvort ég fá aftur sandkorn í augað líkt og í febrúar þegar ég hitti hana Bibb... Bjarney Kötu síðast.

p.s. læt fylgja með mynd síðan á árshátíðinni.

Framboðsfimbulfamb

Kallinn kominn í framboð!
Já nú á að láta að sér kveða í stúdenta pólitíkinni, en síðuhaldari hefur boðað framboð til formanns félagsstúdenta við Háskólann á Akureyri a.k.a. FSHA. Hef ég bugtað mig fyrir settum reglum kjörnefndar og skilað inn framboðsyfirlýsingu á rafrænum snepli, sjálfsvirðingunni fátækari...

Hvað sem framboðsmálum miðar þá verður maður víst að sinna lærdómnum, set mynd af mér við lestur nýverið.

Frygðarstunur og föndur

Gjálífsgoðið og fjölriðillinn P.Magnússon hefur hrundið af stað harðri baráttu fyrir því að vinna kosningu sem bæjarpistillinn BB hefur sett á fót. Með þeirri kosningu er ætlun að ná höndum yfir þann einstakling sem ber af í kynþokka á vestfjörðum. Það hefur verið löngum vitað að P.Magnússon hefur löngum kynnt undir marga frygðarstununa hjá veikari kyninu enda hefur það verið almenn vitneskja að konungur kynþokkans hafi fasta búsetu á vestfjörðum.
Síðuhöfundur telur að það sé löngu tímabært að krýna Magnússon þessum heiðurstitli. Þeir sem vilja veita honum stuðning í komandi kjöri geta sent tilnefningu á kynthokki@gmail.com og eru allir hvattir að skorast ekki undan þeirri ábyrgð að koma titlinum í hús!

Læt fylgja með mynd af gjálífspabbanum á góðri stundu.

Er Guð kona?

Nemendur við Háskólann á Akureyri fögnuðu sinni árlegu hátíð um síðastliðna helgi. Tel ég að kvöldið hafi heppnast með afbrigðum vel, en ómælt magn áfengis var innbyrgt þar á skömmum tíma.

Kvöldið byrjaði með for-fordrykk hjá meistara Jakob, en það má með sanni segja að þar hafi drög verið lögð að vel heppnuðu kvöldi.

Á árshátíðinni voru lögð rök fyrir því að Guð væri karlmaður en ekki kvenmaður. Rökin voru á þá leið að ef Guð væri kona, þá væri Eva (samanber í Adam og Eva) dóttir Guðs. Ef Eva myndi ná sér í karlmann (væntanlega bróður sinn) þá væri Guð tengdamamma hans. Þannig að ég tel að það sé alveg á hreinu hjá flestum að enginn vilji að tengdamamma sín sé Guð.

Ef einhver vill rengja rökin þá er það alveg sjálfsagt.

p.s. ég læt fylgja með mynd frá kvöldinu, en glöggir ættu að sjá síðuhaldara inn á milli þeirra glæsimenna og kvenna sem prýða myndina.

Gaumstol

• Síðuhaldari átti ferð suður á land um helgina. Tilgangurinn var sá að koma félagsvísinda- og lagadeild Háskólans á Akureyri inn í huga ungmenna sem hyggja á háskólanám. Ferðin tókst með ágætum og var upplýsinga þörf íslenskra ungmenna óþrjótandi en ég var fulltrúi sálfræðiskorar.
  Ein af þeim spurningum sem ég þurfti í sífellu að svara var um þær tegundir sem sálfræði greinist upp í eftir B.A gráðu. Læt hér fylgja með þá upptalningu:
• Atferlisgreining (e. behavioral analysis)
• Afbrigðasálfræði, klínísk sálfræði og ráðgjafarsálfræði (e. abnormal psychology, clinical psychology, counseling psychology)
• Félagssálfræði (e. social psychology)
• Heilsusálfræði (e. health psychology)
• Hugræn sálfræði (e. cognitive psychology)
• Lífeðlisleg eða líffræðileg sálfræði (e. physiological psychology, biological psychology)
• Mannþáttafræði (e. human factors psychology)
• Persónuleikasálfræði (e. personality psychology)
• Réttarsálfræði (e. forensic psychology)
• Skólasálfræði og menntasálfræði (e. school psychology, educational psychology)
• Skynjunarsálfræði (e. sensation and perception psychology)
• Taugasálfræði (e. neuropsychology)
• Tilraunasálfræði (e. experimental psychology)
• Vinnu- og skipulagssálfræði (e. organizational and industrial psychology, I/O psychology, occupational psychology)
• Þroskasálfræði (e. developmental psychology)
• Þróunarsálfræði (e. evolutionary psychology)

Ég læt fylgja með mynd sem einstaklingur með gaumstolaeinkenni teiknaði, en gaumstol verður oftast vegna skemmda í hægra heilahveli. Það eru taugasálfræðingar sem leggja stund á rannsóknir á einstaklinum sem hlotið hafa heilaskaða Þeir einstaklingar sem bera þau einkenni virðast oft ekki veita vinstri hluta fyrirmyndarinnar nokkurn gaum.

Ísknattleikni

Síðuhaldari var með einkenni hitasóttar um síðustu helgi. Þessi hækkaði líkamshiti kom á mjög svo óhentugum tíma sökum þess að ég var að panta mér lífsstarf David Attenborough í formi DVD diska, en það spannar 4360 mínútur af hinu þessu fræðsluefni.
Reyndar er það svo að ekki hef ég þessar 4360 mínútur til aflögu í augnablikinu vegna þess að ég er að reyna að sinna háskólanámi, vinnu fyrir einn kennara minn, setu í stjórn nemenda við félagsvísinda- og lagadeild, þar sem ég gegni formennsku, deildarfundarsetu fyrir hönd nemenda við félagsvísinda- og lagadeild, setu í nefnd um bættar fjárhagslegar áherslur deildarinnar, setu í stjórn Félagsbústaða sem reka stúdentagarðana við Háskólann á Akureyri, setu í undirbúningsnefnd ráðstefnu um vímuefnanotkun unglinga auk þess að sinna kynningarmálum fyrir félagsvísinda- og lagadeild Háskólans á Akureyri.

Reyndar brá ég á það ráð að skella mér í ísknattleik á sunnudaginn var, til þess að hrista þessa óværu úr mér og tókst það með ágætum, en ég var orðin hitalaus á þriðjudegi.

Læt fylgja mynd af fríðum hóp sálfræðinema sem keppti innbyrðis í íshokkí "á" helginni sem leið.

Fjölskyldufimbulfamb

Í vikunni bárust þau boð að sunnan frá vígi fjölskyldunnar að allir kosningabærir einstaklingar, tvo ættliði aftur, ættu að flytja lögheimili sitt vestur til upprunans, nánar tiltekið til Ísafjarðarbæjar. En frumburður föður okkar hefur slegið sig til riddara og stefnir á framboð fyrir Samfylkinguna.
Fjölskyldufaðirinn telur það skyldu allra blóðtengdra fjölskyldumeðlima að styðja við þennan frambærilegasta einstakling sem Samfylkingin hefur alið af sér (en síðuhaldari hefur nú þegar við skrif á þessum pistli, krossað sig tvisvar fyrir að hafa nefnd þessa pólitísku hreyfingu svo oft sem ber á nafn). En þess má geta að síðuhaldari hefur ekki verið þekktur fyrir sósíalískan þankagang.

Vill nú “litli” bróðir óska systur sinni að sjálfsögðu alls hins besta í komandi sveitastjórnarkosningum, þó svo að stóra systir ætli í pólitískt framboð með sósíalískum brag.

En til að vega upp þessa umræðu þá læt ég meðfylgjandi krækju fylgja með.

Pungar og pjásur

Sökum gífurlegs álags á “comment” kerfið hjá viðkunnanlegum síðustu misserin, þá sér hann sér ekki annað fært en að létta á því með nýrri tíðindafærslu.

Jæja nú er vertíð súrra punga og brennivíns runnin upp. Fyrstu pungarnir hafa þegar runnið um kverkar Viðkunnanlegs og ekki hægt að kvarta yfir því. Enda telur síðuhaldari að súr kynfæri hinnar íslensu sauðkindar sér allra meina bót. Ekki er hákarlinn síðri í matgæðum, enda eru það engin rök þótt sá fiskur geti ekki losað þvag, en það er einmitt galdurinn á bakvið hinum guðdómlega ilm sem leggur öllu jöfnu upp úr þorrabakkanum.

Heyanna þankar.

Jæja þá er skólinn að renna af stað þessa önnina. Bóka- og matarkortainnkaup hafa sett svip sinn á fjármál síðuhaldara. En óþarfi er að örvænta strax, þar sem námslánin eru að koma í hús, fyrir utan það að ég er víst að vinna með skólanum þessa önnina.
En hvað gerir maður þegar ný önn hefst? Maður fer náttúrulega að huga að því hvað maður eigi að gera þegar henni lýkur, en hugmyndirnar hafa verið að streyma um vit Viðkunnanlegs undanfarið. T.d. hef ég verið að skoða gönguferðir um Tatrafjöllunum í Slóvakíu, en þar myndi maður geta spókað sig í töluverðri hæð yfir sjávarmáli í austari hluta Alpafjalla. Eina sem gæti komið í veg fyrir að síðuhaldari gæti hrint þessari hugmynd í framkvæmd er vinnufyrirkomulag næsta sumars, en honum hefur verið boðinn vinna bæði fyrir sunnan og hér fyrir norðan. En þess má geta að steypubílaakstur er ekki á dagskrá Viðkunnanlegs næsta sumars!

p.s. læt fylgja með mynd af tásum Viðkunnanlegs í Ordesa þjóðgarðinum á norður Spáni frá því 2005. En eins og glöggir lesendur ættu að hafa tekið eftir þá hefur áður birst mynd af síðuhaldara berum að ofan, en nú er hringnum lokað með því að birta mynd af honum berum að neðan...

Hættulega viðkunnanlegur vs. Glanni Glæpur

Eftir að ég fór að horfa á Latabæ með henni Bjarney frænku minni um jólin. Þá tók ég fljótlega eftir því að ég kannaðist líllega við klæðnaðinn á einum kauðanum. Ég fór og skoðaði gamlan vitnisburð um jól liðinna ára, þar komst ég fljótlega að því að búningur Glanna glæps er sláandi líkur þeim herraklæðnaði sem ég bar á jólunum 1983.

Nú er það bara í höndum síðulesenda að dæma um hvor aðilinn er verðugur fulltrúi þess að klæðast áður nefndum "búning".

Hólí sjítturinn það er komið 2006!

Usss árið 2006 er runnið af stað. Enn eitt skref í átt þess að verða þrítugur. Get nú ekki sagt að ég sé tilbúinn að meðtaka það alveg strax, en hef víst lítið um það að segja.

Það tók mig ekki nema tvo daga að snúa við sólarhringnum þegar ég byrjaði jólafríið um miðjan desember. En fljótlega eftir að ég slapp að norðan var mér þrælað í vinnu hjá systur minni og mág, við að grafa fyrir drenlögn. Verð nú að viðurkenna að það var ágætis tilbreyting að vinna með höndunum í stað þess að sitja upp í skóla og reyta af mér síðustu hárlufsurnar sem enn sitja fastar á kollinum, þó að það sé löngu tapað stríð sökum þess að hárvöxstur á víst að erfast í gegnum móður ættina, en hann afi minn hefur ekki eins grósku mikinn makka eins og ég þykist enn vera með.

Læt fylgja mynd af okkur systkinunum fyrir framan jólatréð árið 1983.
Ef grannt er skoðað gæti maður haldið að Magnús Scheving hafi stolið hugmyndinni af búning Glanna Glæps af Viðkunnanlegum.

Jólin gott fólk!

Kynjahlutföll í sjónvarpinu

Viðkunnanlegur heyrði frétt þess efnis um daginn að það hallaði verulega á hlutfall kvenna í fjölmiðlum.

Karlar eru mun meira áberandi í fjölmiðlum en konur. Svipuð kynjahlutföll eru í fréttum, sjónvarpsþáttum og auglýsingum en það hallar verulega á hlut kvenna. Hlutfall karla í fjölmiðlum er á bilinu 65-80% á móti 20-35% kvenna en hlutfallið breytist lítillega eftir því hvort um er að ræða auglýsingar, fréttir, fréttatengda þætti eða sjónvarpsþætti. Þetta kom fram á málþingi á vegum Rannsóknarstofu í kvenna- og kynjafræðum og menntamálaráðuneytisins sem haldið var í Háskóla Íslands í dag.

Eftir að hafa heyrt þessa frétt þá ákvað Viðkunnanlegur að ráðast í smá rannsókn á fyrirbærinu, en hann taldi að engin stoð væri fyrir þessum fullyrðingum.

Framkvæmt:
Nr:1 Horft á næturrásina á sýn
Nr:2 Flakkað um á netinu
Nr:3 Ýmis tímarit skoðuð

Niðurstaða:
Nr:1 Kvenmenn í miklum meirihluta
Nr:2 Kvenmenn í miklum meirihluta
Nr:3 Kvenmenn í miklum meirihluta

Viðkunnanlegur vill þá koma því hér á framfæri að eftir nákvæmar rannsóknir á fullyrðingunum hér að fram að ekkert sé til í því að halli á hlut kvenna í hinum fjölmörgu miðlum sem í boði eru.

Jólasmári...

Jæja þá er maður kominn í jólafrí og mættur á suðurlandið. Innihald og fjölbreytni þess er ísskápurinn minn inniheldur hefur takið stakkaskiptum á þessum fáeinu klukkustundum sem það tók að aka hingað suður, harma ég það ekki.
Það sem liggur fyrir um jólin er að rifja upp gamla hnit (badminton) tilburðu, en ég er víst búinn að lofa mér í slíkt um jólin. Reyndar hafði ég einhver stór orð um að rassskella keppendur ekki aðeins með spaðanum, þannig að ég er tilneyddur að standa mig í þessari áskorun.

Eins og dyggi lesandinn hefur ef til vill rekið augun í, þá er ég búinn að breyta útlitinu á síðunni, en við það missti ég allt tengla safnið mitt, þannig ef ég er að gleyma að bæta einhverjum inn, skiljiði þá bara eftir orðsendinu þess efnis.

p.s. Takið eftir því hversu glæsilega slaufu kallinn er með!

Heimilis óhald.

Nú hefur það varla farið fram hjá nokkrum manni að kallinn er farinn að reka heimili. Á þessum stutta tíma hefur húsráðandi þurft að reka óvelviljaða ríkisstarfsmenn á dyr fyrir að reyna kúga fjármuni af húsráðanda í formi afnotagjalda.
Einnig hefur húsráðanda tekist að læsa sig úti, auk þess að halda glimrandi salsapartí á þriðjudagsnóttu.
Nú þegar þessi námsönn er að ljúka þá leiðir maður hugann að komandi önn, með tilheyrandi glaðskap, reynslunni ríkari.
Þetta hefur kennt mér það að aldrei að opna hurðina fyrir úlpuklæddum kvenmönnum á mánudagskvöldi og eiga aukalykil við höndina.

Allt að gerast.

Papa Viðkunnanlegur hefur staðið í ströngu undanfarið við að "skanna" inn myndir úr albúmi fjölskyldunnar. Þessi mynd er tekin, að ég tel inn í Leirufirði, á síðustu áratugum liðinnar aldar.
Ég held að svipurinn lýsi best því andrúmslofti sem ríkjandi er á lokadögum haustannar.

Galakvöld Kumpána.

Helgin var alveg glimrandi, en ég sótti galakvöld félagsvísinda- og laganema sem var haldið á hótel KEA á föstudagskvöldinu. Þar borðaði ég kjötrétti í forrétt, aðalrétt og eftirrétt og skolaði öllu niður með húsivínsins. Eftir að formlegu skemmtanahaldi lauk var skundað heim á leið en því lauk nú ekki betur en svo að ég endaði á bakinu, ekki innandyra heldur út á bílastæði, eftir að hafa “flogið” á hausinn á einhverri helv.. svellbungunni... p.s. í jakkafötunum!

Nú ríður á að beisla klárinn áður en merin fer á beiðsl.

Með þessi orð í huga sá Viðkunnanlegur sér ekki annað fært en að rífa upp skápar hurðina í svefnherberginu til þess að athuga hvort ekki væri nú til hrein skyrta fyrir komandi helgi, sökum þess að betra væri nú að eiga sæmilegan kyrtil fyrir komandi átök. En um helgina verða glóðaðir geltir og annað góðmeti látið leika við bragðkyrtlana í höfuðvígi norðlenskra kaupfélagsins, í tilefni þess að nemendafélag félagsvísinda- og laganema er að halda sína árlegu veislu.

þar sem þvottavélar stúdendagarðana hafa ekki verið að skila öllum ermum á skyrtunum út úr sér, fannst Viðkunnalegum ráð í tíma tekið með því að skoða aðra kosti í stöðunni, þ.e. kaupa nýjan kyrtil, taka áhættuna á því að þvottavélin skilaði báðum emunum út eða vera í jakkanum allt kvöldið...humm...

Í skammdegis sortanum læt ég eina góða mynd fylgja með...

Viðkunnanlegur með puttann á púlsinum.

Sjónvarpsáhorfendur urðu vitni að rússnesku klámi í stað kvöldfréttanna.

Sjónvarpsáhorfendum í Kailaras á Indlandi brá heldur betur í brún þegar þeir ætluðu sér að horfa á kvöldfréttir líkt og vanalega í sjónvarpinu, því í stað fréttatímans var áhorfendum boðið upp á rússneska klámmynd.
Bálreiðir áhorfendur, sem ætluðu sér að horfa á fréttaþáttinn sem er á ensku, kenna tæknimönnum endurvarpsstöðvar sjónvarpsstöðvarinnar um mistökin. Þykjast þeir vera vissir um það að tæknimennirnir hafi verið að nýta sér aðstæður til þess að horfa á klámmyndir frá Rússlandi.
Hundruð bálreiðra íbúa þustu á götur borgarinnar í mótmælaskyni og kröfðust þeir uppsagnar tæknimannanna.
Man Singh Verma, yfirmaður sjónvarpsstöðvarinnar, sagði að rannsókn hafi leitt í ljós að starfsmenn endurvarpstöðvarinnar hafi verið að senda út klámmyndir frá rússneskri stöð í stað fréttatímans, frá indversku sjónvarpsstöðinni DD-1. Hann sagði að gripið yrði til viðeigandi ráðstafana vegna atviksins.

Fróðleikshorn Viðkunnanlegs.

Sálfræði.
Gríska orðið sem er þýtt ‘sál’ er psyche. Í kviðum Hómers frá 8. öld f.Kr., Ilíonskviðu og Ódysseifskviðu, er orðið einkum notað um einhvers konar lífsanda; sálin greinir að lifandi líkama frá dauðum. Á 7. og 6. öld f.Kr. víkkaði merking orðsins nokkuð. Farið var að líta á sálina sem aðsetur persónuleikans, sem sjálf manns. Pýþagóringar og aðrir töldu að sálin lifði af dauða líkamans og gæti endurfæðst í öðrum líkama. Heimspekingurinn Empedókles frá Akragas (um 490-430 f.Kr.) hélt því til að mynda fram að hann hefði áður verið til sem stúlka, fugl og fiskur og meira að segja runni.
Ein frægasta umfjöllun Platons um sálina er í Ríkinu en þar er sett fram kenning um þrískiptingu sálarinnar. Sálin er sögð hafa þrjá hluta, skynsemi, skap og löngun. Skynsemin sækist eðli sínu samkvæmt eftir sannleika og þekkingu og eftir því að stjórna, skapið sækist eftir heiðri og viðurkenningu og löngunin sækist eftir mat, drykk og kynlífi. Sömuleiðis hafa hlutar sálarinnar ólíkar dygðir. Viskan er dygð skynsemishlutans, hugrekki dygð skapsins og hófsemi er dygð löngunarinnar. Réttlætið, sem er fjórða og síðasta höfuðdygðin, er svo fólgið í því að hver hluti vinni sitt verk.

Spurning vikunnar!

Hvaða fyrrum einræðisherra getur fagnað þvi að eiga sama afmælisdag og Viðkunnanlegur?

Einkunnarorð Viðkunnanlegs!

Don't be political girliemen (Schwarzenegger, 2004).

.............!

Andskotans, djöfulsins, helvítis, óværu, gyllinæðis, sárastóttar, stórubólu, kláðalúsar, gubbupestar, hitasóttar, fótaóeirðar, frunsu, kviðslits, blöðrubólgu, berkjubólgu, flogaveikis, dreyrarsýkis, iðrabólgu, kossageitar, æxlis, niðurgangs, nefslímsbólgu, njálgsverkjar og afnotagjalds andskotar!

Áfram kerlingar!

Hættulega viðkunnanlegur óskar kvennfólki á Íslandi til hamingju með daginn og stendur að sjálfsögðu með þeim í baráttunni fyrir jafnrétti!

Viðkunnanlegur ákvað að sýna stuðning sinn í verki í dag með því að:

Með því að búa sjálfur um rúmið í morgun.
Með því að skafa bara helminginn af snjónum af framrúðunni.
Með því að aka með handbremsuna á.
Með því að reyna að stýra með hnjánum á meðan ég talaði í símann.
Með því að gleyma að slökkva ljósin á bílnum um leið og ég læsti lyklana inni.
Með því að stunda yfirhylmingar viðrekstur.
Með því að reyna að pissa ekki á setuna.

Viðkunnanlegur rakst á þessa forustugrein á Baggalútur.is en hann gat bara ekki stillt sig um að birta hana hér í heild sinni, vona að Baggalúts menn harmi það ekki:

Skelfing sem ég er orðinn þreyttur á tuðinu í þessum kellingum alltaf hreint.
Það er ekki stundlegur friður fyrir endalausu jarmi um launamisrétti, kúgun og og almennt óréttlæti heimsins í garð kvenna. Íslenskra kvenna! Þvílíkur endemis þvættingur.
Yfir hverju hafa íslenskar konur að kvarta? Það er svoleiðis hlaðið undir rassgatið á þessu hérna. Það eru krúsídúllubúðir og hárgreiðslustofur á hverju götuhorni, þær geta valið úr tískublöðum, sjónvarpssápum, fitubrennslunámskeiðum og fæðubótarefnum. Þær fá bæði að kjósa og keyra bíl.
En nei. Íslenskar konur eru kúgaðar. Þeim finnst þær nefnilega ekki fá nógu vel borgað fyrir það sem þær kjósa að kalla sambærileg störf. Sumsé vinnuframlag þegar frá er talin aukavinnan sem þær ekki nenna að vinna - og að því gefnu að þær séu hvorki óléttar - né á túr.
Þetta er bara rugl. Ef konur eru svona óánægðar með laun sín og kjör ættu þær bara að asnast til að skipta um vinnu, ekki satt? En nei, þær láta sko ekki bjóða sér hvað sem er.
Þau fáu störf sem konur á annað borð hafa nennu til að stunda, altsvo þau störf þar sem þær komast auðveldlega úr til að fara í ræktina - og svo í maníkjúr, hafa þær nefnilega markvisst lagt undir sig með frekju og yfirgangi.
Vinnuveitendur neyðast því til að tæla með gylliboðum í þessi sömu 'sambærilegu' störf karlmenn, sem á annað borð þola samvistirnar við andlitsspartslað, dragtklætt kvennagerið.
Og nú rær þetta hyski öllum árum að því að komast í stjórnir fyrirtækja - finnst það bersýnilega hið eftirsóknarverðasta af öllu eftirsóknarverðu.
Stjórnarseta! Annálaðasta letibykkjudjobb sem fyrirfinnst. Jafnvel hörðustu bissníssnaglar breytast við slíka setu á örskotsstundu í forherta kaffiþambara og kjaftatíkur. Vei viðskiptalífi íslensku ef bannsettar kellingarnar komast þangað inn brjóstfalskar og klaufpilsaðar með lattebolla sína og kjaftablöð.
Svo eru þeir sem voga sér að andhæfa þessari óvinveittu yfirtöku kvensniftanna úthrópaðir karlrembufauskar og vændir um steingerða heilastarfsemi. Huh! Sér er nú hver remban. Ekki erum við vesalingarnir með sérstaka karlakirkju, karlréttindafélag Íslands, karlasögusafn eða moðerfokking Rannsóknastofu í karlafræðum!
Það hefðu nú adeilis heyrst skrækir í horni ef við hefðum haldið Karlafund á Þingvöllum síðastliðið sumar. Karlafundur!? Hvað með uppvaskið? Ætlaðir þú ekki að þvo bílinn? Fékkstu ekki að hitta strákana í fyrrasumar?!
---
Annars eru einhverjar lopaklæddar rauðrófur að hvetja kynsystur sínar til að leggja niður störf næstkomandi mánudag.
Bravó! segi ég nú bara. Vonandi verður það til frambúðar.
(Kellingar, 2005).

Bjór + Bjór = Pizza

Það hefur komið á daginn að stíf bjórdrykkja sumarsins hefur skilað sér í bættum fjárhag hússjóðsins við Klettastíg, þar sem fjárhagsskýrsla þriðja ársfjórðung sýnir glögglega fram á bjartari tíma. En ég vil þar afleiðandi þakka þeim fjölmörgu sem leið sína lögðu í kotið á liðnu sumri og gera mér það fært að gæða mér á flatbökum þann 19. Október.

Að lokum kemur hér hugleiðing ætluð vinstri sinnuðum hugvörgum:

"Sé maðurinn jafn frjáls í ríki náttúrunnar og ég hef sagt, og sé hann þar hinn æðsti herra yfir sjálfum sér og eignum sínum, jafn hár þeim hæsta og einskins undirsári, hví skyldi hann þá vilja sjá af frelsi sínu? Hví skyldi hann vilja sjá og selja það undir annarra? Svarið liggur í augum uppi."(Locke, 1689).

Illur beygur í buguðum belli.

Jæja þá eru þrjú próf búin á sjö dögum og hefur Viðkunnanlegur verið leiddur eins og lamb til slátrunar oftar en einu sinni. En á meðfylgjandi mynd þá má sjá þann bás sem notast hefur verið við að miðla fóðri til haustlambsins.
En þegar Viðkunnanlegur hefur gengið inn í hverja slátrunina á fætur annarri þá hefur sú hugsun skotið upp kollinum hvort ekki hefði verið viturlegra að hafa skráð sig í Bachelorinn frekar en HA.

Nú verður tekið á því!

Eins og norðlenskir háskólanemar hafa varla látið fara framhjá sér, þá hefur Háskólinn á Akureyri tekið í gagnið nýja líkamsræktar aðstöðu fyrir starfsfólk og nemendur, en með mikili óþreyju hefur verið beðið eftir slíkri aðstöðu.

Boðið er upp á nýtísku græjur, miðað við austurevrópska staðla og hefur Viðkunnanlegur þegar kynnt sér aðstöðuna og leist honum bara ljómandi vel á bæði aðstöðu og innanstokksmuni. En á komandi mánuðum verða vöðvar kýldir og sviti þerraður í fyrrgreindri aðstöðu. En Viðkunnanlegur hefur þegar fjárfest sér í XXS bol og skræpóttum náttbuxum.

Hvetur Viðkunnanlegur þá sem áhuga hafa á alvöru líkamsrækt að kynna opnunartíma stöðvarinnar og nýta sér um leið þetta fágæta tilboð.

Aðgát skal höfð í nærveru sálar.

Vegna áskorunar um að koma með nokkra punkta um hugarefni Viðkunnanlegs þá fór ég á stúfana og kafaði ofan í viðkvæmt sálarlíf mitt og gróf upp nokkrar bældar minningar.

Staðreyndir um Hr. Viðkunnanlegan:

Hann hefur ákaflega gaman af heimilda- og fræðsluþáttum, en hann var áskrifandi að Lífandi vísindum til fjölda ára, ásamt því að fella tár er Nýjasta tækni og vísindi var tekið af dagskrá ríkissjónvarpsins.

Hann hefur nú í nokkurn tíma verið að safna bókunum "Alfræðisafn Almenna bókafélagsins", sem gefið var út á árunum 1967-1975. Er kominn með 12 stk af 21.

Hann hefur keypt um tíu eintök af Rokkað í Vittula eftir Mikael Niemi, mjög svo ákjósanleg afmælis- og jólagjöf. En honum hefur tekist að lesa hana um sjö sinnum.

Honum hefur tekist að verða 28 ára án þess að geta af sér afkvæmi (ritað með fyrirvara).

Sá matréttur sem viðkunnanlegum er ekki bjóðandi hefur ekki ratað á borð hans, þrátt fyrir að hafa prófað matarmenningu fjölda landa (ásamt ölmenningu viðkomandi lands).

Fróðleikshorn Viðkunnanlegs.

Hættulega viðkunnanlegur hefur komist á snoðir um að ekki sé allt með felldu í Færeyska sauðfjárstofninum. Lagðist Viðkunnanlegur undir feld og velti fyrir sér hugsanlegum orsökum og afleiðingum slíkrar sköpunnar.

Spurning:

Eru kindur í Færeyjum með mislangar lappir, til að geta staðið betur í hlíðunum þar?

Svar:

Í Færeyjum eru tvö sauðfjárkyn. Annað er með lengri vinstri lappir, hitt með lengri hægri lappir. Það fyrra snýr alltaf hægri hliðinni upp í hlíðina, hitt vinstri hliðinni. Það fyrra fer í sífellu réttsælis kringum eyjuna, hitt rangsælis. Þetta er kallað aðlögun í þróunarfræðinni.

Bændur þurfa að gæta þess vel að þessi kyn blandist ekki því að þá gætu komið út kindur sem væru jafnlangar í báðar lappir, og náttúruvalið verkar gegn því. Á þessu er raunar ekki heldur nein veruleg hætta vegna þess að kindur af mismunandi stofnum snúa aldrei eins og æxlast því ekki.

Betra er autt rúm en illa skipað.

Á vafri um veraldarvefinn rakst Viðkunnanlegur á áhugaverða reynslu sögu á tíðindasíðu vinkonu sinnar.

The story of life,

THE WORLD'S SHORTEST FAIRY TALE

Once upon a time, a guy asked a girl "Will you marry me?"
The girl said, "NO!"

And the guy lived happily ever after and went fishing, hunting and played golf a lot and drank beer and farted whenever he wanted.

THE END.

Mun Hættulega viðkunnanlegur hafa þetta að leiðarljósi það sem eftir er...